Í samfélagstúlkanáminu færð þú fræðslu, þjálfun og fjölbreytt verkfæri til að sinna samfélagstúlkun á faglegan og árangursríkan hátt. Samfélagstúlkur miðlar merkingu milli aðila sem ekki tala sama tungumál án þess að taka afstöðu til málefnisins. Í náminu lærir þú um hlutverk, ábyrgð, verklag og viðfangsefni túlka. Að auki færð þú fræðslu um íslenskt samfélag og helstu stofnanir þess og færð þjálfun í að kryfja álitamál og að túlka við mismunandi aðstæður.

Samfélagstúlkur túlkar samskipti milli fólks og opinberra stofnana víðs vegar í félags-, mennta- og heilbrigðiskerfinu, í félagslegum aðstæðum, í daglegu lífi, á vinnustöðum og hjá félögum þar sem hagsmunir annarra en hans eigin eru undir.

• Íslenskt samfélag: Þjálfaðu aðlögunarhæfni þína og dýpkaðu skilning þinn á fjölbreyttum menningarheimum innan íslensks samfélags.
• Stofnanir í íslensku samfélagi: Fáðu innsýn í helstu stofnanir samfélagsins og hlutverk þeirra, svo sem sveitarfélög, menntastofnanir, heilbrigðisþjónustu og félagsþjónustu.
• Siðfræði og álitamál: Þjálfaðu hæfni þína til að greina og takast á við álitamál í fjölmenningarlegu samhengi út frá mannréttindum, jafnræði, gagnsæi og siðareglum túlka.
• Fjölmenningarfærni: Dýpkaðu skilning þinn á ólíkum menningarheimum og auktu færni þína í að miðla merkingu milli mismunandi aðila.
• Aðstæður og öryggi: Lærðu að leggja mat á aðstæður og að skapa umhverfi þar sem allir aðilar upplifa öryggi, virðingu og jafnræði.
• Undirbúningur fyrir túlkun: Lærðu að skipuleggja og undirbúa verkefni út frá þörfum allra sem að málinu koma.
• Umsýsla og þjónusta: Fáðu upplýsingar og verkfæri fyrir þjónustu þína út frá faglegri framkvæmd og umsýslu.
• Túlkunartækni: Þjálfaðu túlkunartækni til að tryggja nákvæm og hlutlaus samskipti milli tungumála og menningarheima þar sem fagmennska og virðing er í forgrunni.

Námið er fyrir fólk, 18 ára og eldra, sem hefur góða þekkingu á tveimur eða fleiri tungumálum, menningarheimum og siðvenjum og vill starfa sem samfélagstúlkar og hefur þá hæfni sem þarf til að takast á við alla hluta námsins. Nánari upplýsingar um hæfni má nálgast á vef: https://frae.is/namskra/allar-namskrar/

Markhópur framhaldsfræðslunnar samkvæmt stjórn Fræðslusjóðs. Skilmálar og úthlutunarreglur Fræðslusjóðs.

Til að taka þátt í náminu og til að tryggja sem bestan námsárangur þurfa nemendur að hafa færni á stigi B1.1 í íslensku samkvæmt Evrópska tungumálarammanum. Þú getur skoðað rammann betur hér.

• Námsmat byggist á mætingu, verkefnavinnu og virkri þátttöku í náminu.
• Til að ljúka námsbrautinni og útskrifast er nauðsynlegt að ná 80% mætingu.
• Kennsla fer fram samkvæmt námskrá Fræðslumiðstöðvar atvinnulífsins, vottaðri af Miðstöð menntunar og skólaþjónustu sem tryggir gæði og áreiðanleika. Allar námskrár má nálgast hér.
• Námið er niðurgreitt af Fræðslusjóði til að jafna aðgengi og efla nám fyrir fullorðna.
• Námskeiðshald: Athugið að lágmarksþátttaka er forsenda fyrir því að námskeið verði haldið.